عواقب التهرب من تسديد الديون

نتائج هذه شيصير؟  اذا صار عندنا في المجتمع الحالة الواضحة عدم التسديد لا سمح الله ولا قدر .
اولا يسد سبيل المعروف وللأسف هذا صاير ! يعني الآن لو تسوي استبيان عند الناس يقول اذا واحد جاك يريد يقترض من عندك تقرضه او ما تقرضه لو كان الأمر إليك ؟ كثير من الناس لا يحبون الإقراض مع أن الاقراض أفضل من الصدقة بما ورد بسبعة عشر مرة اثوب.  ليش كثير من الناس ما يقبلون على الاقراض لما يرونه من المماطلة وعدم السداد وانه على قولهم يطلع الشعر على لسانه وبعده ذاك الطرف ما سدد وما أعطى فيقول لك من البداية ترك الذنب أولى من الاستغفار. لا تقرض ولا تعل قلبك . زين هذا سد لباب المعروف ! الناس قسم منهم فعلا صادقون ومحتاجون إلى الاقتراض فإذا إنسد هذا الباب انسد على الناس باب خير كثير. منو السبب؟  انا اللي صرت اقترض وما اسدد وأخذ وما أدفع فأعطيت للمجتمع فكرة انه ترى اذا تريد تضيع فلوسك اقرضها! سد باب للمعروف.

شيء آخر سيء صار وهو نشاط البنوك الربوية في الإقراض.
اكو حاجات عند المجتمع هذا اللي يريد يستسعي في بيت ذاك اللي يريد قضية زواج هذا اللي يريد يشتري له سيارة هذا اللي يريد يعالج إبنه هذا اللي يريد يمشي أمور نفقته هذا اللي عليه دين ايجار البيت؛ طيب هذي حاجات موجودة ماذا يصنع الناس؟ مادام هذا المؤمن بسببي وبسبب أمثالي ما قام يقرضني اروح للبنك الربوي ادفع ربا فينشط الربا في المجتمع ! واحد من الأسباب منو ؟ انا دفعت الناس إلى أن يذهبوا الى هذا المجال. ومن نتائجه انه يبقى على هذا الإنسان المقترض ما يخلص يعني الآن انت قدرت تشرد من دائنك مدة سنتين وثلاث وخمس وعشر يسقط بالتقادم ؟ ما يسقط بالتقادم.  إلى يوم اللي هذا الإنسان يروح الى ذلك العالم يقولو له ترى هذا الميراث اللي تركه قسطو منه الديون والا يورطوه ذاك اليوم ( من بعد وصية يوصي بها او دين) .قبل ما تسدد الديون لا يجوز أن يوزع الميراث .طيب اذا حصل هذا المديون اللي ما يسدد ولد مثله وأمثاله بعد ! قال عمي الرجال راح ديونه هو يحل المشكلة، وبينه وبين ربه احنا خلينا الان نمشي امورنا وبعض الاحيان ترى يصير هذا. انت ويش تزرع تغرس تحصل نفس الثمرة . تزرع وفاء تحصل احلى ثمار الوفاء من أبنائك، تزرع التزام ومراعاة لحقوق الناس تحصل الك ابن حاضر ان يضحي بحياته من أجل أن ينفذ وصيتك. ولا سمح الله ذاك اللي ما عليه من حقوق الناس ولا من قضاياهم يحصل إليه ابنه يقول له عمي هذا الحجي كله حجي فارغ وين الوصية جيبوها حتى احرقها! انت زرعت هذا انتجت ذاك !

آخر حديثنا المطلوب من المقرض ان يلاحظ حال المقترض.
ليس صحيحا ما قد يوجد في بعض المقرضين من انه يكون قاسيا، شديدا يقول له يا رجل انا ما عندي الان هل تطلب مني أن اطلع عيالي مثلا في الطريق في هذا البرد؟ صحيح انت الك دين علي بس هل تطلب مني ان اطلع زوجتي وعيالي في الطريق في هالبرد؟ بعض هؤلاء يقول لك بقسوة اي نعم هذي مو مشكلتي مشكلتك انت لازم تحلها ! هذا بعد مخالفة إلى:( وان كان ذو عسرة فنظرة إلى ميسرة) . هذا اللي يقول هالحجاية المقرض ، احنا خلصنا حكايتنا مع المقترض . لا انسان مقترض اقترض بشكل طبيعي عنده نية السداد خالفت حساباته ما كان ينبغي تعرض إلى مشكلة انسرق منه أموال، خسر في أسهمه اللي جمعها. تجي تقول له انا مو غلطتي هذي غلطتك انت ، مالي شغل، القانون ما يحمي المغفلين ومن هالكلام هذا غير الصحيح. هنا لازم يلتفت إلى ما قاله سبحانه وتعالى عن :( ويخافون سوء الحساب ).
في الحديث عن الإمام الصادق عليه السلام جاءه رجل فقال الامام الصادق له (ما لفلان يشكوك؟) قاعد يشتكي عليك فلان. قال له يشتكيني لأني اخذت حقي منه ما خليته يفر ولا يزر . قال بلى ولكن ألا تخاف سوء الحساب ؟ قال له كيف ؟ قال له يوم القيامة قسم من الناس يخشون ربه ويخافون سوء الحساب ماخافوا أن يظلمهم الله - لأن الله ليس بظلام للعبيد- ولكن خافوا الاستقصاء! يقول له مو شغلتي هذي ، والله ما قدرت اصلي ؛مو شغلتي هذي اللي ما يصلي نار جهنم، نسيت فلان واجب علي من الواجبات نفس الكلام اللي قلته في هذه الحياة الى ذاك مو شغلي انا ، القانون لا يحمي المغفلين نفس الكلام يقولوه لك هناك اياه.  يخافون سوء الحساب مو أن الله يظلمهم؛ لا. يستقصي عليهم ! صلاتك هذي اللي جبتها شقد بالمية كنت متوجه ليها إلى الله فيها ؟ ٤٠% وين ٦٠% الباقي ؟ والله تدري مشاكل الحياة وكذا ؛ مو شغلي انا هذا شغلك انت غلطتك انت. الكلام اللي إنت أنفقته في هذه الدنيا هو الذي يؤتى به لك يوم القيامة .
فلا تجعزن من سيرة انت سرتها
           فأول راض سنة من يسيرها
الكلام اللي سكتت بيه ذاك المفترض المسكين نفسه يسكتوك بيه يوم القيامة، الحجي اللي الجمت به صاحبك يلجموك به ذاك اليوم وانت مالك حق تعترض ذاك الوقت لان انت وضعت قانون : كما تدين تدان ويطبق عليك.